https://banks.am/am/news/newsfeed/18925
Սյունիքի մարզի Շահումյանի անվան հանքավայրը շահագործող «Չաարատ Կապան» ընկերությունը, որը Կապան համայնքի խոշոր գործատուներից մեկն է (այս պահին ընկերությունն ունի շուրջ 1100 աշխատակից) վարակի տարածման առաջին օրվանից սանիտարահիգիենիկ խիստ հսկողություն է իրականացնում:
«Չաարատ Կապան»-ն այս օրերին նաեւ մի շարք նախաձեռնություններ է իրականացրել ու շարունակում է իրականացնել՝ աջակցելով Կապանում կորոնավիրուսի կանխարգելման աշխատանքներին:
Ընկերությունը ձեռք է բերել եւ Կապանի բժշկական կենտրոնին է տրամադրել բժշկական բազմաֆունկցիոնալ մահճակալներ, ախտահանիչ պարագաներ, բժշկական դիմակներ:
«Չաարատ Կապան»-ը Կապանի Բժշկական կենտրոնի հետ միասին ձեռնամուխ է եղել նախկին վիրաբուժական մասնաշենքի (այն 5 տարի չի շահագործվում) առաջին եւ երկրորդ հարկերի նորոգման աշխատանքներին, որը պետք է վերածվի ինֆեկցիոն բաժանմունքի՝ կորոնավիրուսով վարակված քաղաքացիներին տեղավորելու համար: Ընկերությունը կենտրոնին կտրամադրի նաեւ բժշկական սարքավորումներ, սանիտարական եւ կացության համար անհրաժեշտ այլ պարագաներ:Կապանի բժշկական կենտրոնի տնօրեն Կարեն Մելքոնյանն ասել է, որ կարճ ժամանակում կոմբինատի աշխատակիցներն ահռելի աշխատանք են կատարել, հրատապ լուծել առաջնային խնդիրները:
«Չաարատ Կապան»-ի ղեկավարությունը մշտապես եղել է բժշկական կենտրոնի կողքին, եւ այս օրերի նրանց սրտացավ վերաբերմունքը բոլորովին զարմանալի չէ, ինչի համար մեր բուժանձնակազմի եւ բոլորի կողմից շնորհակալ ենք: Հույս ունենանք, որ այս նախապատրաստական աշխատանքները միայն ապահովության համար ենք իրականացրել եւ բաժանմունքը օգտագործելու անհրաժեշտությունը չի առաջանա»,- ասել է Կարեն Մելքոնյանը: